未開封的清酒可以放幾耐？一篇文幫你了解清酒的賞味期限！

究竟清酒係咪唔會過期既呢？為左解決呢個迷思，我地酒蛙 Sakewa諮詢左我地既唎酒師 Jacky，估唔到清酒的賞味期限竟然係咁樣計？

大家會唔會發覺，好多時去買酒，第一下就係拎起枝酒，望下樽身上面的Label。大家睇Label的時候，不得不留意的一定是樽身標明的製造年月。但大家有無留意，係清酒既樽身上，竟然係搵唔到「賞味期限」喎～！咁究竟清酒係咪唔會過期既呢？為左解決呢個迷思，我地酒蛙 Sakewa諮詢左我地既唎酒師 Jacky，估唔到清酒的賞味期限竟然係咁樣計？

「製造年月」竟然唔係清酒釀造完成的日期？

首先，等我地了解下究竟清酒所標示的製造年月，究竟是代表乜野時間。清酒樽身所標示的製造年月，其實並非清酒釀造完成的日期，而是酒造將清酒出貨裝瓶的日子。其實各個酒造，在清酒完成釀造後會因應自己的判斷，決定會否將清酒進行「貯藏」，才決定出貨給大眾，而這個日期就是清酒上所標示的製造年月。

咁清酒的最佳賞味期限係幾時？

承上文，酒造會根據自身的經驗，決定清酒釀造完成後「貯藏」的時間，然後才出貨給大眾享用。所以，要品嚐到清酒最佳風味的時機，就是趁新鮮飲！當然，我們知道清酒由酒藏送到大家屋企需要經過重重關卡，快則半個月，慢則1~2個月，視乎入口商使用的運輸方法。甚至乎，有時候在店家買到的，更是半年前出貨的清酒。咁究竟，我應該點決定買唔買一枝清酒呢？究竟放幾耐的酒，我唔應該買？

當然，我們會建議大家趁新鮮飲，但如果唔可以的話，下面是我們的建議：

一般清酒（經過高溫火入處理）：
製造年月後的1年內飲用

生詰、生儲藏酒（只經過一次火入處理）：
製造年月後的6個月~1年內飲用（需低溫冷藏保存）

生酒（沒有經過火入處理）：
製造年月後的6個月內飲用（需低溫冷藏保存）

咁清酒會唔會變壞？

以上所標示的適飲日期，大概是你仍然會享用到酒造希望各位品嚐到的香氣和味道。過左呢段時間，清酒仍然是可以飲用的，但清酒的顏色和味道可能會偏離左酒造本來所希望的目標，大家下次飲清酒的時間，就要注意喔！

如何保存未開封的清酒？

首先，我們要了解Sake最大的3個敵人，是紫外線、高溫同空氣。如果各位讀過中學化學都可能會知道，清酒受到紫外線（太陽光、螢光燈、殺菌燈）照射，或者是儲存係高溫的環境，會加速樽身內的化學反應，令到清酒的最佳賞味期限大大縮短。而生酒的情況更加需要小心處理，一定要低溫保存。因為生酒沒有經過火入高溫殺菌處理，所以酒內的酵母菌遇上高溫的話，隨時會再次起身工作喔！所以而家大家知道，點解清酒酒樽，大多都使用左咖啡色，或者綠色，其實都係想盡量避免紫外光的照射。而一直強調的低溫儲存，亦都是為左保持清酒的最佳風味。如果唔係，到時飲落啖清酒唔好飲，未必是酒藏的原因喔！

所以各位買左清酒番屋企，最佳的儲存方式，其實就係放係雪櫃（0~4度）。開封後，因酒體經已同空氣接觸，會開始氧化。酒內的香氣亦都會開始揮發。大家如果真的一次過未能享用完成枝清酒，我地建議最好放番雪櫃，在一星期內品嚐完畢。

最後，即使我們在家中做好保存工作，但如果供應商在運送和售賣的過程中，不好好保存和運輸的話，我地飲用的清酒也未必是最好的。因此我地都係建議大家，同優質有保證的店家購買。千萬不要貪小便宜，以免因小失大喔。等我地一起來享用清酒吧！